A imaxe do disco de chove, formulouse como un proxecto a longo prazo onde a relación entre o fotógrafo e o artista é fundamental para entendela. Formulado o concepto do disco, Javi H (fotógrafo e director de arte do proxecto) e Elena Diez (directora de arte do proxecto) decidiron apostar por unha idea global de imaxe de carácter persoal moi próxima ao artista, un proxecto artesanal onde tódolos detalles fosen en consonancia coa obra. Fotógrafo e artista retomaron a súa amizade para durante un ano documentar de forma realista ou metafórica o concepto do disco e das cancións. 

As 200 unidades de Chove están feitas a man, un duro traballo que poderedes apreciar se vos facedes cunha copia. Todas as accións realizadas de forma manual apoian Chove. Cada portada coa súa respectiva interacción achegan a poder palpar a choiva. A edición especial inclúe un pequeno fotolibro onde as imaxes retratan cada canción facendo que o oínte poida entrar na dimensión visual das mesmas.